Magadugang sa pwersa sang TNT ang pagbalik sang beterano nga si Kelly Williams kadungan sang Game 3 sa tunga sang Tropang Giga kag Barangay Ginebra subong nga adlaw sa Philippine Basketball Association (PBA) Governors’ Cup Finals.
Ini ang una nga pagsabak sang 41-anyos nga basketball star para sa TNT matapos nga nakaangkon ini sang injury sang nagligad nga bulan kasunod sang quarterfinal game sang team batok sa Phoenix.
Maayo man ang timing sang pagbalik ni Williams bangud injured subong ang isa ka player sang TNT nga si Justin Chua kag indi na makahampang tubtub nga matapos ang best-of-seven series.
May average si Williams nga 8.1 points kag 5.0 rebounds sa kada game sa sini nga conference.
Nahibaluan nga patas na subong sa 1-1 ang serye matapos nagdaog ang defending champions nga Ginebra sa Game 1 samtang nagbawi naman sa Game 2 ang Tropang Giga. ##
