Masobra isa ka bulan nga indi makahampang ang San Miguel Beer star nga si June Mar Fajardo matapos ang naangkon nga injury sa wala nga kamot kasunod sang sambuwa sang iya team sa PBA Commissioner’s Cup.
Suno kay Team manager Gee Abanilla, ipaiway anay sang seven-time league MVP ang hampang sa sulod sang apat tubtub anum ka semana nga posible maga-cover sang second half sang elimination round.
PBA IMAGE
Nagsuprer si Fajardo sang fourth metacarpal fracture kadungan sang 115-110 nga kadalag-an sang Beermen batok sa Rain or Shine sang Miyerkules.
Gin-athag sang manager nga wala man nagakinahanglan sang surgery ang injury nga naangkon sang amo nga 6-foot-10 big man.
Ini ang latest injury ni Fajardo halin sang nagpahuway ini sa bilog nga 2020 season bangud sa na-fracture anay nga right tibia.
Siya man ang ulihi nga player nga nagdugang sa lista sang Beermen stars nga injured antes pa man magsugod ang season. Nauna na sa amo nga listahan sanday Terrence Romeo (knee), Vic Manuel (knee), Jeron Teng (hamstring) kag rookie nga si Kyt Jimenez (orbital fracture).
