Padayon ang pagpangita sang kapulisan sa Philippine Basketball Association (PBA) player nga si John Amores matapos ginaalegar na-involve ini sa isa ka shooting incident sa Laguna.
Base sa reports, ang gintiro sang nasambit nga NorthPort guard amo si certain Lee Cacalda, 37 anyos, kag ginapahayag nga isa ka seaman.
Base sa inisyal nga impormasyon halin sa Lumban Municipal Police Station, nagbaisay ang duha kasunod sang basketball game alas sais kagab-i, Septyembre 25, kag ginhangkat ni Amores si Cacalda sang tapungulay.
Sang nakalab-ot sila sa Barangay Maytalang Uno, nagpalupok na ang PBA player gamit ang wala pa matumod nga armas-luthang.
Maswerte nga wala sang naangkon nga mga samad si Cacalda, samtang base sa CCTV footage, nakit-an nga gilayon nga nagpalagyo si Amores.
Wala pa naghatag sang statement ang PBA samtang padayon pa ang imbestigasyon.
Matandaan nga duha ka tuig ang nagligad, kontrobersyal man si Amores bangud nag-amok ini sa hampang sa NCAA sang naga-eskwela pa siya sa Jose Rizal University.
Nangtapungol ini sang players sa College of St. Benilde sang Season 98 rason nga ginkakas siya sa basketball program sang Heavy Bombers.
Apisar sang amo nga insidente, ginkuha siya sang NorthPort sa fifth round sang PBA Season 48 Rookie Draft kag nangin 51st overall pick.
Ini na ang iya ikaduha nga season sa PBA kasunod sa nagapadayon nga Governors’ Cup kag may average nga 5.1 points kag 1.6 rebounds.
