ILOILO CITY – Mabaskog nga ginpanginwala ni PBA player Paul Desiderio ang alegasyon sang iya anay partner nga ginasakit niya ini.
Sa ginpagwa nga statement ni Desiderio, ginpanginwala niya nga ginasakit niya kag gina-abusuhan si Agatha Uvero sang sila ang magkarelasyon pa.
Sila ang nagbulagay sang Mayo subong nga tuig.
Suno kay Desiderio, indi niya mahimo nga magsakit sa isa ka babayi bangud nga may yara man nga anak nga babayi sa iya anay partner.
Ginpahayag man sini nga magakooperar siya sa imbestigasyon sang PBA kag kampante ini nga ma-clear ang iya pangalan sa alegasyon ni Uvero.
Nagpangayo man ini sang pasaylo sa mga naapektuhan bangud sang resulta sang amo nga isyu ilabi na sa iya pamilya, abyan, team kag sa iya anak nga babayi kag lalaki.
Nakahanda man ini nga mag-atubang sa kun ano man nga kaso nga ipasaka sa iya.
Apang, nagpamahog man ini nga indi siya magpa-areglo sa tion nga maklaro ang iya pangalan bangud suno sa iya, tuman ang iya paghimakas agud nga malab-ot ang handum sa kabuhi kag ginhimo ini nga may dedikasyon kag dungog.
Sang Miyerkules, gin-alegar ni Uvero nga gin-abusuhan ini ni Desiderio.
Suno sa iya, nangin bayolente si Desiderio sa kabilugan sang ila nga relasyon.
Ginpahayag niya nga siya ang ginakuga, ginasumbag, ginsipa kag ginahaboy sa dingding apisar nga nagadala ini sang ila anak.
