Ginmultahan sang Philippine Basketball Association (PBA) sang P20,000 si Rondae Hollis-Jefferson bangud sa gintuga sini nga komosyon sang nagahingapos na kuntani ang hampang sang Rain or Shine kag TNT sa PBA Commissioner’s Cup sang nagligad nga semana.
Sang amo nga tion, nagkadto gid mismo si Rondae sa likod sang bench sang ila kasumpong nga Elasto Painters bangud luyag sini sukmaan ang referee nga nagtawag sang technical foul sa iya utod kag TNT replacement import nga si Rahlir Hollis-Jefferson sang 49-segundos na lang ang nabilin sa sambuwa.
Bangud sang hitabo, indi ang referee ang nakabais ni Rondae kundi ang Rain or Shine coach nga si Yeng Guiao kag ang iban nga katapo sang Elasto Painters.
Sang ginpatawag na ni PBA commissioner Willie Marcial, nagpangayo sang pasaylo si Rondae kag nagpasalig nga indi na ini matabo liwat.
Nagpangayo man sang pasaylo ang anay NBA player kanday coach Yeng, sa Rain or Shine team, kag mangin sa PBA fans bangud sa amo nga tensyon.
Nagdepensa man ini nga wala na siya sa lineup sang TNT gani makalibot siya kag makakadto sa bench sang Rain or Shine bilang isa ka fan sang hampang nga basketball.
Sabat naman sang PBA, bisan indi na makahampang si Rondae sa TNT bangud sa pagsulundan sang liga nga indi pwede maislan ang import sang duha ka beses sa isa lamang ka conference, yara gihapon ang pangalan ni Hollis-Jefferson sa lineup sang Tropang Giga sa ila nga East Asia Super League campaign.
Ang TNT amo ang nagatiglawas sang PBA sa EASL — buot silingon, player gihapon si Rondae Hollis-Jefferson kag employed gihapon sa amo nga telecommunication franchise.
Sa pihak nga bahin, ginmultahan man sang P10,000 ang beterano nga coach nga si Guiao matapos nakit-an sa camera nga nagpakita sang iya dirty finger bangud sa nangin aktwasyon ni Hollis-Jefferson.#
