Mas naglapit pa ang San Miguel Beermen sa kampyonato sa PBA Commissioner’s Cup matapos sini ginkamasaan ang Magnolia Hotshots sa Game 2 sang best-of-seven finals series, 108-85, sa Mall of Asia Arena.
Kun sang Game 1 diutayan lang nga ma-uyang ang double-digit lead sang Beermen antes natigayon nga malutos sini ang Hotshots, mas nangin hugot ang ila pagbantay sa Game 2 tubtub gid sa tion nga ila nabatian ang final buzzer.
Sa kadalag-an sang San Miguel kag pag-abanse sa serye, 2-0, napalawig man ang ila nga winning streak sa 11 kun isipon pati ang halin sa elimination round.
Nagpanguna sa team ang import nga si Bennie Boatwright nga may 34 puntos samtang ang Best Player of the Conference contender naman nga si CJ Perez ang nakabubo sang 20 puntos. Naka-19 puntos man si June Mar Fajardo sa amo nga hampang.
Kabug-usan nga 16 ka tres ang napaulan sang San Miguel kag pito naman ang iya sang Magnolia.
Balantayan ang ikatatlo nga game sang series sa Mierkules, Pebrero 7, 7:30 PM, sa Araneta Coliseum sa Quezon City.#
(Photo: PBA)
