ILOILO CITY – Balantayan subong nga hapon ang PBA Skills Challenges bilang kabahin sang PBA All-Star Weekend sa Passi City Arena.
Sa interview sang Bombo Radyo kay anay Passi City Mayor kag Department of Agrarian Reform Undersecretary Jesry Palmares, iya ginpahayag nga alas-tres subong nga hapon, hiwaton ang Slamdunk Challenge, Three-Point Shooting, kag Obstacle Challenge.
Sa obstacle challenge, balantayan sanday Brandon Ganuelas-Rosser kag Justin Arana Arana, Beau Belga, Christian Standhardinger, Raymond Almazan, JM Calma, Ato Ular, Joseph Gabayni, James Laput, Dave Marcelo, kag Jeepy Faundo.
Balantayan sa three-point shootout sanday Kevin Alas, Tyler Tio, Jeremiah Gray, Gian Mamuyac, Marcio Lassiter, Jerrick Balanza, Baser Amer, Roger Pogoy, Aaron Black, Paul Lee, Arvin Tolentino kag Juami Tiongson.
Samtang, sa Slam-Dunk competition, magapasakup sanday Ganuelas-Rosser, David Murrell, Chris Lalata kag Tyrus Hill.
Ala-singko sa hapon, hiwaton naman ang Rookies/Sophomores/Juniors (RSJ) game sa tunga sang Team Stalwarts kag Team Greats.
Sa Marso 12 nga amo ang highlight, mahimo nga malantaw ang sambuwa sang Team Japeth Aguilar versus Team Scottie Thompson.
Ginpahayag sang natungdan nga mahimo nga magbakal sang tickets pinaagi sa Local Government Unit sang Passi City kun sa diin, “first come, first served basis” ini.
