Nag-abanse na sa finals sang PBA Governors Cup ang defending champion nga TNT Tropang Giga matapos ginlutos ang Rain or Shine, 113-95, sa Game 5 sang semifinal playoff sa PBA Season 49 Governors’ Cup sa Ynares Center sa Antipolo.
Sang nagtakop ang first quarter, 28-25, ginapasagunsunan ini sang TNT sang 12-0 sa pagbukas sang second quarter kag ginlimitahan lamang ang Elasto Painters sa 14 points sa amo nga frame.
Wala na nag-preno ang team halin sang nakuha sini ang 56-39 lead sa first half.
Nagpanguna sa team si Rondae Hollis-Jefferson nga amo man ang import nga naghakwat sa tropa para makuha ang kampyonato sa amo man nga conference sang nagligad nga tuig.
Ginbubo sini ang 36 points, 11 rebounds, nine assists, kag six steals sa sambuwa nga amo ang nagtapos sa best-of-seven series, 4-1.
Ini man ang nagpabalik kay Coach Chot Reyes sa finals sa PBA sa labing-una nga tion halin sang nagbalik ini sa TNT bench sang nagligad nga season.
Hulaton na lamang sang TNT ang winner sa tunga sang semis series sang Barangay Ginebra kag San Miguel kun sa diin gina-uyatan na sang Gin Kings ang lead, 3-2, matapos ang 121-92 nga resulta sang hampang sa Game 5 subong man nga gab-i.
