ILOILO CITY- Gin-engganyo ni President Ferdinand Marcos Jr. ang mga Filipinos sa Brunei nga magbalik sa Pilipinas kag mag- invest sang ila kaugalingon nga negosyo.
Kadungan ini sang pagpakigkita ni Marcos sa Filipino community bilang isa mga aktibidad sa iya state visit sa Brunei.
Suno sa presidente, naganami na ang dalagan sang ekonomiya sa Pilipinas kag ini ang bunga sang promisa nga iya ginhimo sang nagsumpa ini bilang Presidente.
Ginpasalamatan man niya ang mga Filipinos overseas para sa ila indi matupungan nga abilidad kag paghatag importansiya sa trabaho.
Gindayaw man sini ang manami nga reputasyon nga nahatag sang mga Filipino bangud sa ila dekalidad nga sahi sang serbisyo.
Base sa data sang Department of Foreign Affairs, may yara sang kapin 20,000 Filipinos sa Brunei as of 2021.
Nagtaas naman ang remittances halin sa overseas Filipino workers sa Brunei sa $28.53 million sang 2023, nga 1.8 percent mas mataas sa $27.65 million remittance nga narecord sang 2022, base sa data sang Bangko Sentral ng Pilipinas.
