Ginbasol ni President Ferdinand Marcos Jr. si anay President Rodrigo Duterte sa kapaltahan sang anay administrasyon sa pagsolbar sa mga irregularidad sa mga flood control projects.
Suno kay Marcos ini man ang rason kun ngaa ang iya nga administrasyon ang nagapadayon sa subong sa pagpangusisa sini kag pagsabat sa nasambit nga irregularidad.
Kadungan sang pagbisita ni Marcos sa Canada ginpanginwala sini ang akusasyon nga mahinay ang iya administrasyon sa pagpasabat sa may mga sala kag ang ginapahayag sang publiko nga nagapili lamang ang iya administrasyon sa pagpasabat sa mga nadalahig.
Suno kay Marcos, nagasandig sa ebidensya ang imbestigasyon kag nagapakita ini nga ang mga iregularidad nagsugod pa antes sang iya termino.
Ginmuno man sang Presidente ang resulta sang imbestigasyon sang Independent Commission for Infrastructure kun sa diin nagresulta na sa pagpasaka sa 65 ka indibidwal.
Sa idalom man sang iya administrasyon ang natabo nga pagpa-freeze sang kapin P24.7 bilyon nga balor sang mga bank account nga gina-alegar may kaangtanan sa anomaliya nga nagakatabo sa gobyerno.
Dugang pa ni Marcos nga padayon pa ang imbestigasyon kag ang Office of the Ombudsman ang magadesisyon kun himuon nga state witness si anay Public Works Secretary Manuel Bonoan.
