Ginkondenar ni Pres. Ferdinand Marcos Jr. ang mga indibidwal nga nag-umpisa sang gamo sa isa ka matalunsay nga hublag-protesta sang Setyembre 21.
Ginpasiguro man sini nga manabat ang tanan nga may kahilabtanan sa amo nga kinagamo.
Ginpahayag ni Presidential Communications Office Undersecretary kag Palace Press Officer Claire Castro nga kadam-an sa mga nag-intra sa hublag-protesta malinong nga ginpalab-ot ang ila mga hibubun-ot, apang pila sa mga grupo ang nanggamo, partikular sa bahin sang Mendiola, Manila.
“Peaceful rally, nasamahan lang ng iilang nais manggulo, mananagot ang lahat. Iyan ang nais ni Pangulong Ferdinand R. Marcos Jr. sa lahat ng sino mang gumamit ng karahasan sa naganap na peaceful rally noong Linggo,” pahayag ni Castro.
Suno kay Castro, indi nangin upang ang kinagamo sa lapnagon nga hublag-protesta, kag ginkilala niya ang lehitimo nga kaakig sang Pilipino batok sa korapsyon, ilabi na sa mga proyekto sang gobyerno.
Apang, ginpunto niya nga ginkondenar sang administrasyon ang paggamit sa mga kabataan sang mga grupo nga suno sa iya nagapanago sa likod sang itom nga maskara agud manggamo.
“‘Team Itim’ kung maituturing — hindi sila raliyista na may lehitimong adhikain laban sa korapsyon kundi gumawa lang ng karahasan, magnakaw, manunog at manira,” dugang ni Castro.
Nag-warning man si Castro sa mga yara sa likod sang mga makatilingala nga hulag.
“Hindi kayo makakalagpas sa kamay ng batas at ang mga tao sa inyong likuran na gumamit sa inyo – mga gahaman sa kapangyarihan. Hindi kayo dapat paligtasin. Hustisya ang uusig sa inyo,” dugang pa.
Pahayag ni Castro, padayon ang administrasyon sa kampanya sini batok sa korapsyon, sa pagpanguna mismo ni President Marcos nga una na nag-mando sang imbestigasyon sa mga iregularidad sa flood control projects.
“Magpapatuloy din ang Pangulo sa naumpisahan na ito, at sa tulong ng taumbayan na magiging matapang sa pagbunyag ng katotohanan, ang pang-aabuso sa kaban ng bayan ay mailalantad at malalabanan,” pahayag ni Castro.
