ILOILO CITY-Nagsentro sa importansiya sa padayon nga pagbato para sa kahilwayan ilabi na ang proteksyon para sa teritoryo kag sa soberanya sang pungsod ang mensahe ni President Ferdinand Marcos, Jr kadungan sang selebrasyon sang 126th Independence Day sa Pilipinas.
Gin-engganyo ni Presidente Marcos ang mga Pinoy nga pukawon ang espiritu sang pagka-Pilipino, buhion ang nasyonalismo sa dugo, kag magpartisipar sa mga selebrasyon para sa Independence Day.
Tubtub subong suno sa presidente, padayon ang pagpakigbato para sa kahilwayan gani nga wala man sang kakapoy nga nabatyagan sa pagbantay, wala sang katapusan ang pagpakigsapol sa iban nga mga pungsod para nga mabuligan ang Pilipinas nga matib-ong ang mga interes sini kag kinamatarong, kag padayon man ang mga proyekto nga pang-kultura agud nga mapalig-on pa gid ang identity bilang mga Pilipino.
May kaangtanan naman sa selebrasyon subong nga adlaw, patigayunon man ang Parada ng Kalayaan: Grand Parade of Local Government Floats” sa Quirino Grandstand kun sa diin 10 ka local government units ang naimbitaran sa grand parade.
Kalakip sa magaparada sang floats amo ang Candon City sa Ilocos Sur, Cebu, Cavite, Aurora, Bulacan, Negros Occidental, Iloilo, Surigao del Norte, Jolo sa Sulu Province, kag ang Zamboanga City.
Sa parade float ng Iloilo, ipakita ang Cry of Santa Barbara kag ang establishment sang Federal State of the Visayas.
Nahibaluan nga ang public plaza sa Santa Barbara amo ang lugar kun sa diin una nga ginwagayway ang hayahay sang Pilipinas sa gwa sang Luzon lima ka bulan matapos gindeklarar ni General Emilio Aguinaldo ang Philippine Independence sa Kawit, Cavite.
Sa Parada ng Kalayaan, magapasakop man ang mga local government officials kag mga national government agencies.
