Iloilo – Nagpangayo sang pasaylo sa publiko si Police Brigadier General Leo Francisco, director sang Police Regional Office 6 matapos nakabaton sang mga reklamo tuhoy sa ginpatigayon nga modified signal jamming sa Iloilo City kadungan sang selebrasyon sang Dinagyang Festival 2023.
Matandaan nga si Francisco ang nagpanguna sa pahingyo sa Iloilo City Government sang signal shutdown agud masiguro ang seguridad sang publiko batok sa ano man nga pagpamahog ukon pagpangsabotahe.
Sa interview sang Bombo Radyo kay Francisco, iya ginpahayag nga indi niya maeksplikar ang rason ngaa nadalahig ang iban nga lugar sa nagluntad nga signal jamming.
Nahibaluan nga naka-eksperyensya sang signal shutdown ang portion sang Oton, Tigbauan, Leganes, Pavia kag mangin ang Probinsya sang Guimaras.
Suno kay Francisco, ang National Telecommunications Commission lamang ang makasabat sang palamangkutanon tuhoy sa wala nasunod nga kasugtanan sang modified signal jamming nga nag-apekto sa pila ka kabanwahanan sa probinsya sang Iloilo.
Ginpahayag dugang sang natungdan nga nangin madinalag-on man sa gihapon ang resulta sang signal shutdown bangud nangin malinong kag matawhay ang pagsaulog sang Dinagyang Festival 2023 nga wala sang may narekord nga insidente.
Samtang, may kaangtanan naman sa statement ni Iloilo City Mayor Jerry Trenas nga indi na liwat pag-iendorso ang signal shutdown, ginpahayag ni Francisco nga maga-adjust ang kapulisan kun ano ang igapatuman nga security arrangement sa masunod nga pagsaulog sang Dinagyang Festival.
