ILOILO CITY – Padayunon ni Police Brigadier General Rene Pamuspusan ang maayo nga hinimu-an ni Police Brigadier General John Bulalacao bilang Director sang Police Regional Office (PRO) 6.
Ini ang ginpromisa ni Pamuspusan kadungan sang turn-over of command ceremony nga ginpatigayon kadungan sang pagretiro ni Bulalacao kaina nga adlaw.
Sa nangin mensahe ni Pamuspusan bilang bag-o nga PRO-6 Director, iya ginpromisa nga iya hatagan sang igtalupangod ang tuhoy sa pagtapna sang illegal drugs, kriminalidad kag insurhensya sa Western Visayas.
Magluwas diri, ginpahayag man ni Pamuspusan nga iya nga ipadayon ang mga maayo nga aktibidad kag programa nga ginpatuman ni Bulalacao kasubong sang pagpasangkad sang police community relations.
Magluwas sa retirement, lubos man ang kalipay ni Pamuspusan bangud nga dungan nila nga ginsaulog ni Bulalacao ang ila kaadlawan.
Bilang mag-mistah sa Philippine Military Academy – Maringal Class of 1988 kag may pareho nga kaadlawan, ginpahayag ni Pamuspusan nga kasubong nga gintagna sila ni Bulalacao nga mangin Director sang PRO-6.
