Ginsupendi sang National Police Commission (NAPOLCOM) ang anay hepe sang Criminal Investigation and Detection Group (CIDG) kag subong direktor sang Police Regional Office 12 (PRO12) nga si Police Brigadier General Romeo Macapaz.
Suno kay NAPOLCOM Vice Chairperson kag Executive Officer Commissioner Rafael Vicente Calinisan, igapapatuman ang 90-nga adlaw nga preventive suspension batok kay Macapaz bangud sa gina-alegar nga grave misconduct kag conduct unbecoming of a police officer.
Pahayag naman ni PRO12 spokesperson Police Major Rissa Hernaez, naka-leave si Macapaz kag wala sa ila area of responsibility, apang tinguhaan sini nga makig-angot sa iya.
Matandaan nga sang Agusto 14, nagpadulong sa NAPOLCOM ang mag-utod nga Julie “Dondon” kag Elakim Patidongan agud mag-file sang reklamo batok kay Macapaz angot sa kaso nga missing sabungeros.
Sa pahayag ni Elakim, ginsiling sini nga ginbalabagan ni Macapaz ang imbestigasyon sa kaso sang ginkuha sini ang ila mga cellphone samtang yara sila sa kustodiya sang Cambodia.
Suno pa sa iya, gin-delete ni Macapaz ang pila ka messages sa ila mga telepono kag gintago ang mga SD card nga makabig kuntani nga ebidensya sa kaso.
Nahibaluan nga humalin 2021 tubtob 2022, gin-report sang pulisya nga may 34 ka mga manugbulang ang nadula.
Suno sa report, possible biktima sila sang kidnapping angot sa isyu sa game fixing.
Sa separado nga pahayag, gintuad ni Dondon Patidongan nga gintagbong kag ginlubong ang mga biktima sa Taal Lake, sa diin gin-akusaran sini ang negosyante nga si Atong Ang bilang utok sang krimen.
Gin-ulamid man sini ang actress nga si Gretchen Barretto sa kaso, bagay nga ginpanginwala sang duha.
Sang Agusto 1, ginpasaka na ang mga kaso nga multiple murder, serious illegal detention, enforced disappearance, direct bribery, kag obstruction of justice batok kanday Ang kag sa iban pa nga may kahilabtanan.
