Gin-athag ni PBGEN. Randulf Tuaño nga wala ginapahanugutan ang mga sibilyan nga magmaneho sang Philippine National Police Patrol vehicle base sa polisa sang ahensya.
Kasunod ini sang pahayag ni Iloilo City Mayor Raisa Treñas nga magahatag sang bulig ang City Government sa mga kapulisan pinaagi sa pagtrain sang mga civilian driver nga magmaneho sang police patrol cars.
Suno kay Tuaño, Regional Director sang Police Regional Office 6, iya ginpahayag nga pagatun-an pa sang ahensya kun may ara sang salakyan nga iga-issue sang Local Government Unit sa ila kag makonsiderar sang PRO6 ang civilian driver sang siudad.
Nahibaluan nga yara sa kapin 3,000 ka mga pulis sa Western Visayas ang wala nakahibalo sa pagdrive sang sang four-wheeled vehicle kag motorsiklo.
Madumduman nga nagpahayag si Department of the Interior and Local Government Sec. Jonvic Remulla nga importante nga nakahibalo gid ang mga kapulisan sa pagmaneho.
Ginpakigbahin man ni Remulla nga magapaguwa ang DILG sang memorandum circular kun sa diin isa na ini sa mangin requirement sa mga aplikante sang Philippine National Police.
