𝗠𝗔𝗡𝗜𝗟𝗔 — Nagpanindugan ang Philippine Chamber of Agriculture and Food Inc. (PCAFI) nga indi maayo ang inisyatibo sang gobyerno nga magbaligya sang daan nga stock sang bugas gikan sa National Food Authority (NFA) sa presyo nga P29 kada kilo sa mga vulnerable sectors.
Suno kay Philippine Chamber of Agriculture and Food Inc. president Danilo Fausto, indi makasarang ang NFA sa pagbaligya sang ila stock tungod kay tig-ululan na subong.
Ginpahayag man sini nga ang inisyatibo nga ginatawag nga “Bigas 29” mahimo maghatag sang sala nga impresyon nga ini isa ka sustainable.
Sa pihak sini, ginpamatukan naman ni Department of Agriculture Assistant Secretary Genevieve Guevarra nga ang programa sustaibable.
Ginpaathag niya nga regular nga naga-ilis ang NFA sang bugas para sa ila buffer stocking kag ang “Bigas 29” magahatag sang pamaagi agud mahatag ang mga daan nga stock sang bugas sa palaabuton.
Nahibaluan naman nga sang Biyernes, nagsugod na ang large-scale trial sang pagbaligya sang daan nga buffer rice stocks sa mga Kadiwa sites sa Metro Manila kag Bulacan.
Ang P29 kada kilo nga bugas ang para lamang sa mga benepisyaryo sang 4Ps, senior citizens, PWDs, kag solo parents.
Suno kay Guevarra, limitado lamang sa 10 kilo kada bulan ang pagbaligya sang P29 kada kilo nga bugas kada pamilya.
Gin-athag man sang natungdan nga agud mapatuman ang bug-os nga implementasyon sang programa, nagpahayag ang Department of Agriculture (DA) nga kinahanglan ang 69,000 metric tons sang bugas agud makabaligya sang 10 kilos sang bugas sa kada pamilya kada bulan sa presyo nga P29 kada kilo, sa target nga 6.9 milyon nga mga pamilya.
