Iloilo City –Indi mamilit si Iloilo City Mayor Jerry Treñas kun indi pagbatunon ni Mr. Nereo Lujan ang imbitasyon nga mag-lecture ini tuhoy sa pag-manage sang trapiko sa syudad.
Nahibaluan nga si Lujan ang pinuno sang Provincial Information and Community Affairs Office sang Iloilo Provincial Capitol, kag isa sa mga mabaskog nga kritiko sang alkalde sa traffic management sang syudad.
Sa interview sang Bombo Radyo kay Treñas, iya ginpahayag nga kun wala man lang sang mahimo ipakigbahin sa pagdumala sang trapiko ang kritiko, mas maayo nalang nga indi ini pagpiliton.
Kun balik-balikan,ginpahayag sang alkalde nga hatagan niya sang P5,000 nga honorarium si Lujan.
Kaangot diri suno sa alkalde, gin-imbitar man sini ang Metropolitan Manila Development Authority agud maghatag sang solusyon sa pag-improve ang sitwasyon sang trapiko sa syudad.
Sa subong, ginaduso ni Treñas ang pagmando sa Public Safety and Transportation Management Office nga magpatigayon sang quarterly trainings para sa mga traffic aides.
