ILOILO CITY- Nagpangayo sang pasaylo ang kontrobersyal nga sanday PCapt. Charlie Sustento kag PLt Col Jonathan Pinuela angot sa makahang nga mga tinaga nga ila ginpangbuy-an batok sa Office of the Ombudsman.
Matandaan nga sa press conference sang duha kasunod sang suspension order nga gindagdag sang Ombudsman batok kay Pinuela, gintawag ni Sustento ang amo nga talatapan bilang root of corruption.
Kasunod sang amo nga akusasyon ni Sustento, nagsabat man si Ombudsman Samuel Martires kag ginhangkat si Sustento nga itudlo kag pangalanan ang gintumod sini nga mga corrupt nga Ombudsman nga gin-alegar sini nga nagabaton sang kwarta halin sa mga politiko.
Sa ila joint statement nga gindeliver ni Sustento sa National Headquarters sang PNP sa Camp Crame, ginpahayag sini nga indi niya intensyon nga pakalainon ang Ombudsman bilang isa ka institusyon.
Suno kay Sustento, nadala lamang siya sang emosyon kag nagpautwas lang siya sang iya nabatyagan angot sa ginakabig niya nga inhustisya batok sa kaangay nila nga kapulisan.
Suno naman kay PNP Chief Dionardo Carlos, apisar nagpangayo sang pasaylo, iga-subject sa gihapon sanday Sustento kag Pinuela sa nagakaigo nga proceedings sang organisasyon sa idalom sang
disciplinary and grievance mechanism sang PNP.
Mismo si Carlos ang nagpangayo man sang apology sa Ombdusman bangud sa nangin aktwasyon sang duha ka pulis.
