Ginahanda na sang Philippine Coast Guard (PCG) ang ila nga technical divers agud ipadala sa Taal Lake agud magsugod sang ‘search kag retrieval operation’ matapos ang impormasyon nga gina-alegar nga didto ginlubong ang bangkay sang nadula nga manugbulang.
Suno kay PCG Commandant Admiral Ronnie Gil Gavan, ginmanduan na niya ang Coast Guard Special Operations Force nga makipag-angut sa Department of Justice (DOJ), National Bureau of Investigation (NBI), kag Philippine Navy agud makabulig nga ma-beripika ang report nga didto sa lake ang nagkaladula nga cockfighters.
Matandaan nga ginbuyagyag sang isa ka akusado nga ginpatay kag ginalubong ang mga manugbulang sa sulod sang Taal Lake. Wala naman ginpangalanan ang mga responsable sa krimen, apang ginasiling nga posible nga sobra pa sa 100 ka manugbulang ang ginpatay, kag indi lang 34 nga amo ang una nagguwa sa inisyal nga reports.
Ginkumpirma naman ni Justice Secretary Jesus Crispin “Boying” Remulla nga na-istorya na niya ang lalaki nga nagbulgar sini nga alegasyon. Nangayo man ang tiglikom sang dugang nga tyempo agud maplastar nila ang development sa sini nga mga kaso.
Matandaan nga nadula ang mga manugbulang sa tunga-tunga sang Abril 2021 tubtob Enero 2022. Halin sila sa nagkalain-lain nga mga lugar sa Laguna, Batangas, Manila, kag Bulacan.#
