ILOILO CITY–Ginapangita sa subong sang Philippine Coastguard (PCG) kun ano nga Roll on-Roll-off (RORO) vessel ang nakadalasa sang sakayang pandagat nga nagkapan kag nawasak sa Iguana Bank sa Guimaras .
Sa interview sang Bombo Radyo kay Petty Officer 1 Casimiro Alvarez , Deputy station commander sang PCG Dumanggas substation, iya ginpahayag nga ila pa nga hibaluon kon ano nga barko ang naglabay sa nasambit nga baybayon alas 11 kagab-1.
Suno kay Alvarez, may yara na sila sang natumod nga barko apang ila pa nga ginatipon ang mga impormasyon kag ginatul-id kon bala ini ang barko nga nagdalasa sa sakayang pandagat sa diin sakay ang tatlo ka tripulante.
Dugang pa ni Alvarez, padayon subong nga gina imbestigaran ang nasambit nga insidente.
Samtang, nagalaum ang survivor sa nagkapan nga sakayang pandagat sa Iguana Bank sa Guimaras nga makita pa ang iya duha ka mga kaupdanan nga missing.
Sa interview sang Bombo Radyo kay Erwin Mansueto, 54 anyos sang Purok Masipag, Punta Taytay, Bacolod City, iya ginpahayag nga positibo siya nga buhi sa gihapon ang iya kaupdanan nga sanday Rodel Dispojo alyas Lupin, 40 anyos kag pakaisa nga si Sixto Desposo, 30 anyos, lunsay sang nasambit nga lugar.
Nahibaluan nga nakasalbar si Mansueto matapos makahawid sa nagalutaw nga parte sang motorbanca kag naluwas sang may naglabay nga Roll on roll off (RORO) vessel.