ILOILO CITY– Ginbasol sang Philippine Coast Guard (PCG) ang media nga amo ang rason kun nga-a naglala ang isyu sang pagbunggo sang chinese vessel sa sakayan-pandagat sang mga Filipino nga manugpangisda sa Recto Bank sa West Philippine Sea.
Sa interview sang Bombo Radyo kay Vice Admiral Joel Garcia, Deputy Commandant for Administration sang PCG kag director sang National Coast Watch Center, iya ginpahayag nga ginapangunahan sang media ang gobyerno sa pagpatigayon sang imbestigasyon tuhoy sa natabo nga maritime incident.
Bangud sa media, nagalain-lain man sa tagsa ka adlaw ang pahayag sang 22 ka manugpangisda suno kay Garcia.
Ang nasambit nga lihok suno sa natungdan ang nakapalala sa tensyon sa tunga sang Pilipinas kag China.
Sa baylo nga magpa-interview sa media, ginpahayag ni Garcia nga kun tani ginpaidalom sa subjudice ukon nagpirma na lang sang sworn affidavit ang mga manugpangisda kag ipasa sa nagakaigo nga otoridad.
Ginpahayag man sang natungdan nga may yara sang nagakaigo nga proseso sa pagpasaka sang kaso santo sa United Nations Convention on the Law of the Sea (UNCLOS).
Samtang, sa nangin mensahe ni Vice Admiral Joel Garcia sa ika-36 nga anibersaryo sang PCG-Western Visayas nga ginhiwat sa syudad sang Iloilo, wala niya napunggan nga mag-ugtas bangud sa natabo sa Recto Bank.
Ginpahayag ni Garcia nga kasubong nga natum-ok pa gid paidalom ang 22 ka Filipino nga manugpangisda bangud sa ila sala nga aktu.
Naghatag pa sang halimbawa si Garcia agud nga ipaathag ang nagakaigo nga proseso sa tion nga may yara sang maritme incident ukon krimen nga matabo.
Suno sa natungdan, kun may yara sang krimen kasubong sang rape, ang una nga buhaton sang biktima amo ang paghatag sang sworn statement sa otridad para sa imbestigasyon sa baylo nga maghatag sang pahayag sa iban nga tawo ukon sa media.
