ILOILO CITY – Naka tatlo ka trip ang Philippine Coast Guard agud nga idul-ong ang bulig para sa mga biktima sang asud-asud nga linog sa Mindanao.
Sa interview sang Bombo Radyo kay Captain Erlinda Benliro, station commander sang Philippine Coast Guard-Iloilo, iya ginpahayag nga ang una nga hugnat sang bulig ang napadala sang Nobyembre 1 samtang ang ika duha nga hugnat ang ginpadala sang Nobyembre 3.
Suno kay Benliro, ang ika tatlo nga hugnat ang napadala na kahapon nga adlaw karga sa Barko ng Republika ng Pilipinas Cape Engaño.
Wala sang deadline suno kay Benliro ang pagbaton sang Philippine Coast Guard-Iloilo ilabi na sang “in kind” nga bulig kasubong sang pagkaon, panapton, tubig, utensils kag tents.
Samtang, wala pa sang pinal nga listahan kun pila ka bilog nga personnel sang Philippine Coast Guard ang magapakigbahin sa Dugong Bombo 2019.
Ginpasalig ni Benliro nga full-force ang Philippine Coast Guard-Iloilo sa blood-letting activity sang Bombo Radyo Philippines.
Ang pagdonar sang dugo suno sa natungdan ang isa ka baganihan nga aktu sa pagbulig sa mga nagakinahanglan.
