Natigayun na nga ma-rescue sang Philippine Coast Guard (PCG) Iloilo ang masobra 30 ka mga sakay sang fiber boat nga na-stranded sa tunga sang Iloilo-Guimaras Strait.
Ang sakayan nga nastranded amo ang MB Frontier Express, may 29 ka mga pasahero, kag 5 ka crew.
Sa interview sang Bombo Radyo kay Ensign Eljohn Ga,Deputy Station Commander for Administration, Coast Guard Station- Iloilo, iya ginpahayag nga halin sa Jordan Guimaras Wharf ang nasambit nga sakayan kag padulong kuntani sa Iloilo Parola Wharf.
Suno kay Ga, nakabaton sila sang report nga na-stranded ang mga ini 800 metros ang kalayuon sa ila destinasyon bangud man sa naguba nga elisi sang nasambit nga sakayan.
Dugang sang natungdan, gilayon man sila nga nagresponde,kon sa diin gingamit ang MB Manoc-Manoc nga fiber boat sa pagbutong sang nasambit nga sakayan padulong sa Iloilo Parola Wharf.
Wala naman sang may na-record nga nasamaran ukon malain nga natabo sa mga sakay ukon pasahero.
