ILOILO CITY – Mas ginpasangkad sang Philipine Coast Guard (PCG) ang kampanya sa pagpahanumdum sa mga manugpangisda nga maghalong ilabi na subong nga nag-umpisa na ang Habagat Season.
Sa interview sang Bombo Radyo kay Commodore Allan Victor Dela Vega, commander sang PCG-Western Visayas District, iya ginpahayag nga subong nga bulan sang Hunyo, nag-umpisa na ang Habagat Season sa diin masami nagaluntad ang pag-ulan,pugada kag bagyo.
Ginpahayag ni Dela Vega nga ginahingalitan sang mga manugpangisda nga makapalawod sa pihak sang malain nga tiyempo agud nga makakita sang palangabuhi-an.
May kaangtanan diri, ginpahayag ni Dela Vega nga iya nga nahangpan nga luyag sang mga manugpangisda nga makakita sang daku nga ginansya apang mas makapaayo kun nagahalong.
Panugyan sang opisyal, likawan ang paglayag ilabi na kun malain ang tiyempo agud nga malikawan ang disgrasya.
