ILOILO CITY – Bukas ang Philippine Coast Guard sa pagbaton sang mga donasyon para sa mga apektado sang linog sa Mindanao.
Paagi sa Bombo Radyo, mismo si Captain Erlinda Benliro, Station Commander sang Philippine Coast Guard Iloilo, ang nagpanawagan sa tanan nga may bulawanon nga tagipusuon nga maghatag sang bulig para sa mga apektado sang linog.
Suno kay Benliro, labi nga ginakinahanglan sang mga pumuluyo sa Mindanao amo ang matinlo nga tubig, mosquito net, bulong, banig, trapal, tents, food packs kag water purifier.
Ginpahayag ni Benliro nga mahimo nga magpakig-angot sa Philippine Coast Guard ukon ideretso kay Commander Remy Labay ang mga donasyon.
Ang matipon nga donasyon ang igakarga sa Barko ng Republika ng Pilipinas Cape Engaño agud nga mahatag sa mga naapektuhan sang linog sa Mindanao.
