ILOILO CITY — Nagkoordinar na ang Philippine Coast Guard Region VI (PCG 6) sa mga ahensya sang gobyerno agud nga mapasangkad ang pagbantay sa mga pantalan sa rehiyon kag matapna ang smuggling.
Sa interview sang Bombo Radyo kay Coast Guard Captain Weniel Azcuna, Commander sang PCG Region VI, iya ginpahayag nga nagkoordinar na sila sa Sugar Regulatory Administration, Bureau of Customs, Philippine Drug Enforcement Agency (PDEA), Philippine Army, kag Philippine National Police (PNP) agud mas hugton ang pagsekyar sang mga puerto sa rehiyon.
Suno kay Azcuna, naghilisugtanay man sila sang nasambit nga mga ahensya nga tsekyaron ang tanan nga mga dokumento sang produkto nga nagasulod sa Western Visayas.
Ginpahayag man sini nga kinahanglan nga tutokan ang pagsekyar sa mga nagasulod nga fuel, kalamay kag sigarilyo bangud sa mga reports nga may na-smuggle nga sigarilyo halin sa southern part sang Negros.
Tuyo man sang tikang nga doblehon ang pagbantay sa seguridad sang mga pantalan agud masiguro nga indi makasulod ang iligal nga druga.
Sa subong, padayon ang monitoring sang PCG agud nga matapna ang smuggling sa Western Visayas.
