Nagmandu si Philippine Coast Guard (PCG) Commandant Admiral Ronnie Javan nga ipadala ang BRP Malapascua kag BRP Sindangan sa Scarborough Shoal ukon sa Panatag Shoal ukon Bajo de Masinloc sa West Philippine Sea agud masigurado ang safety sang mga manugpangisda nga Pinoy.
Ini kaangot sa kahangawa sang mga manugpangisda nga arestuhon sila bangud sa bag-o nga regulasyon sang China nga ginpatuman epektibo sang Hunyo 15. Nakasaad diri nga i-detain sini sang tubtub 60 ka adlaw kag wala na sang trial ang tanan nga trespassers sa ila teritoryo lakip sa West Philippine Sea nga ila man gina-angkon.
Una na nga nag-request ang Filipino fishermen paagi kay Tropical Fish Gatherer Association President Joeffrey Elad nga mas maayo kun may presensya sang PCG samtang yara sila sa Bajo de Masinloc agud nga indi man sila malingkang kun yara na ang barko sang China.
As of press time, wala pa sang na-report nga may Filipino fishermen nga naaresto ang Beijing.
Una na nga nagpahayag ang Armed Forces of the Philippines (AFP) nga wala sang dapat kahadlukan bangud ang teritoryo nga ginapangisdaan sang mga Pinoy ang sulod man sa exclusive economic zone sang Pilipinas kag indi iya sang China.
Sa pihak nga bahin, sa artikulo sang Global Times nga isa ka Chinese news publication, gin-anunsyo nga nagpadala man ang People’s Liberation Army Navy sang China sang Type 75 Landing Helicopter Dock sa kadagatan nga ila gina-angkon.
Ini nga tikang ang gina-alegar nga preparasyon na nila pananglitan may emerhensya nga matabo kag kun may “provocation” nga himuon ang Pilipinas.
