GUIMARAS – Nagpasalig ang Philippine Coast Guard (PCG) nga mapadasig ang imbestigasyon sa pagtumod sa mga illegal fishers nga ginapahayag nag-abduct kag nagpatay sa myembro sang Bantay Dagat sang Nueva Valencia, Guimaras.
Ang biktima amo si Nelson Bordon, residente sang Barangay Guiwanon sa nasambit nga probinsya.
Matandaan nga Pebrero 24 sang gab-i sang ginpatigayon ang sea patrol operation kun sa diin natabo ang komosyon batok sa biktima kag sa mga ginapahayag iligal nga manugpangisda nga taga-Negros Occidental.
Naka-survive sa amo nga komosyon ang tatlo nga kaupod ni Bordon samtang ang biktima naman ang gindala sang fishing vessel sang wala matumod nga illegal fishers.
Una na ginpahayag ni Pol. Lt. Garry Diaz, hepe sang Nueva Valencia Municipal Police Station nga nakapadulong na sila sa Hinigaran, Negros Occidental sa diin ginapahayag nagpadulong ang illegal fishers sang sila ang nagpalagyo.
Sa Purok 2, Barangay Poblacion sa Hinigaran, naka-dock ang fishing vessel nga may pangalan nga Princess Analayna 3, may duag green kag yellow, nga positively identified sang isa ka Bantay Dagat member nga kaupod ni Bordon nga amo ang nag-atake sa ila sang Pebrero 24 sang gab-i.
Sa interview sang Bombo Radyo kay Commander Edison Diaz, Chief sang PCG- Iloilo, iya ginpahayag nga ipasa na man subong nga adlaw sang Maritime Safety Command Service ang tanan nga impormasyon nga natipon sa pagtsikyar sang tanan nga fishing vessel nga posible responsable sa ramming incident.
Gintuad ni Diaz nga may ginauyatan na subong ang mga pulis nga crew list nga nakuha gikan sa PCG – Hinigaran Substation.
Madamo na suno sa iya sang natipon nga impormasyon natuhoy sa insidente kag posible nga lapit nalang maangkon sang pamilya sang biktima ang nagakaigo nga hustisya.
