GUIMARAS — Naka-record ang Philippine Coast Guard Iloilo sang kapin 24,000 ka mga pasahero sa probinsya sang Guimaras sa pagselebrar sang Manggahan Festival 2024 sa Jordan, Guimaras.
Sa interview sang Bombo Radyo kay Coast Guard Commander Jan Terazona, Commander sang PCG Iloilo, iya ginpahayag nga yara sa 12,200 ang outbound passenger ukon ang nagbyahe paguwa sang probinsya, samtang 11,600 naman ang inbound passenger ukon ang nagpadulong sa isla sang Guimaras.
Suno kay Terazona, 20 ka mga vessels ang nagbyahe sa amo nga adlaw agud magsugat kag dul-ong sang mga pasahero halin sa Parola Wharf.
Ginpahayag man sang natungdan nga kun ikumpara ang numero sang mga pasahero nga nagtambong sa Manggahan Festival sang tinalikdan nga tuig, halos magkapareho lang ini.
Nagdugang naman sang personnel ang PCG sa mga pantalan kasunod man sang pagdugang sang mga vessels nga nagbyahe sa amo nga kahiwatan.
