Nagapadayon ang Philippine Coast Guard (PCG) sa pagpatigayon sang search and rescue operation kasunod sang reports nga may lalaki nga naglukso halin sa cargo-passenger vessel sa Calatagan, Batangas.
Sa inisyal nga report nga ginpaguwa sang Coast Guard District Southern Tagalog, natabo ang insidente sang 3:50 p.m. sang Oktubre 31.
Ginhingadlan ang missing nga pasahero nga si Ralph Bernard Gerona, 26, residente sang Iloilo City, ulihi nga nakit-an nga nakasuksok san itom nga shirt, kag sakay sang MV Maligaya halin sa Manila pa-Bacolod.
Sa separado nga report sang Coast Guard District Southern Tagalog, ginkumpirma ni CG Captain Jerome Jeciel, commander sang Coast Guard Station Batangas, nga nagasuprer ang biktima sa mental health issues (sandig sa kumpirmasyon sang iya utod). Ginpahayag nga wala sang kaupod ang biktima sang tion nga ini ang naglukso.
Gin-alerto man sang PCG ang Vessel Traffic Management (VMTS) sa Corregidor kag nagpatigayon gilayon sang operasyon kaupod sa Coast Guard Sub Station (CGSS) Calatagan, VTMS Batangas, Sea Marshall personnel nga sakay sang amo nga vessel, CGSS Lubang, kag iban pa nga malapit nga sea vessels.
Temporaryo nga gin-untat ang search 6:20 sang amo nga gab-i bangud sa poor visibility apang nag-resume man Myerkules nga adlaw.
Ginalauman ang ihatag nga progress reports samtang padayon man ang search operation. #
