ILOILO CITY – Padayunon sang Philippine Coast Guard ang search and retrieval operation sa Iloilo Strait sa ika-lima nga adlaw.
Sa exclusive interview sang Bombo Radyo kay Lt. Junior Grade Charibel Pugong, deck gunnery officer sang Barko sang Republika ng Pilipinas Cape Engaño, iya ginpahayag nga mas temprano ang ila search and retrieval operations buwas nga adlaw.
Suno kay Pugong, magalibot lang sila sa Iloilo Strait kag Guimaras Strait.
Magadepende pa sa Philippine Coast Guard National Headquarters kun ano ang padulungan sang ila operasyon.
Ginpahayag ni Pugong nga indi sila mag-untat tubtub indi makita ang duha ka mga nabilin nga missing nga pasahero sang MB Jenny Vince.
Maga-untat sang temporaryo ang search and retrieval operations sa tion nga magbisita na si Presidente Rodrigo Duterte sa isla sang Guimaras buwas sa hapon.
Nahibaluan nga nagdangat na sa 31 ang nakita nga bangkay sa nagkulob ang 3 ka pumpboat.
