Nagpaandam ang Philippine Coast Guard (PCG) sa pagpalapta sang fake news ukon disinformation sang mga pro-China vloggers agud baliskadon ang kamatuuran kaangot sa West Philippine Sea kag patalangon ang publiko.
Sa interview sang Bombo Radyo kay Commodore Jay Tarriela, PCG Spokesperson for the West Philippine Sea, iya ginpahayag nga kinahanglan nga manabat ang mga online influencers nga nagapalapta sang sala nga impormasyon nga nagapahina sa paghugpong sang pungsod kag nagaserbe sa interes sang foreigners.
Suno kay Tarriela, ang disinformation ang ikaduha nga pinakadako nga pamahog sa pagdepensa sang gobyerno sa West Philippine Sea, kasunod sang direkta nga agresyon sang China.
Ginpahahayag sang natungdan nga agud matuman ang hamdom ni President Ferdinand Marcos Jr. nga indi pag-ihatag ang bisan isa ka pulgada sang teritoryo sang Pilipinas, kinahanglan nga maghugpong ang pungsod kag maintindihan sang publiko ang matuod nga sitwasyon sa West Philippine Sea.
Ginpakigbahin ni Tarriela nga sang ginlunsyar nila ang transparency initiative agud ibulgar ang agresyon sang China sa West Philippine Sea, nangin target sila sang mga troll nga nagapalapta sang peke nga balita agud gub-on ang iya reputasyon.
Bangud sa nagadako nga papel sang social media sa disinformation, nagpanawagan si Tarriela sang mga mabakod nga regulasyon sa online content agud mapunggan ang pagbaliskad sang mga issue nga may kaangtanan sa national security.
