Naka-heightened alert status na ang Philippine Coast Guard (PCG) Western Visayas, kaangot sa nagahilapit nga pista minatay.
Sa interview sang Bombo Radyo kay Commodore Philipps Y. Soria, District Commander, PCG Western Visayas, iya ginpahayag nga umpisa subong nga adlaw, Oktubre 28 tubtob Nobyembre 5, yara na sila sa heightened alert status, sa diin tanan nga mga naka-leave, naka-work pass,kag mga naka-RNR (rest and recreation) ang insigida nga ginpabalik kag ginpareport.
Suno kay Soria, masobra 700 ka mga personnel’s ang ila igadeploy sa nagkalain lain nga pwerto kag baybayon sa rehiyon agud magbantay sa posible pagdinaguso sang mga pasahero kag turista sa nagahilapit nga “Undas”.
Dugang pa sang natungdan, bukas ang ila nga Malasakit help desk sa mga pwerto agud nga mahatagan sang bulig ang mga nagakaigo nga concerns.
Ipatuman man sang talatapan ang strikto nga pagbantay upod ang iban pa nga mga ahensya sang gobyerno lakip man ang Philippine Coast Guard Auxiliary.
Magabantay man sa palibot sang mga beaches sa rehiyon ang Coastal and Security Beach Patrol bangud ginalauman sang talatapan ang pagdagsa sang mga turista sa tourist spot sang Western Visayas.
