Gintapos na sang Philippine Coast Guard ang search and retrieval operation sa pito ka missing nga mga indibidwal nga sakay sang nagkapan nga duha ka motorbanca nga halin sa Boracay, Aklan kag pakadto sa Caluya Island, Antique sang Agusto.
Sa amo nga insidente, tatlo ang kumpirmado nga patay.
Sa interview sang Bombo Radyo kay Captain Weniel Azcuna, Commander sang Coast Guard Western Visayas, iya ginkumpirma nga sang Sabado pa nila gintapos ang nasambit nga operasyon.
Apang suno sa iya, padayon man ang coastal search sa mga lugar kun sa diin mahimo gin-anod ang mga biktima.
Sang damlag lang, may yara man sang isa ka bangkay nga nasapwan sa area sang Mindoro kag possible isa ini sa pito ka mga missing apang wala pa sang kumpirmasyon.
Base sa imbestigasyon, nagaguwa nga ang sakay sang duha ka sakayan ang lunsay halin sa Equator Construction Company nga naka-base sa Caluya, Antique kag nagdesisyon nga mag-enjoy kuntani sang long weekend sa isla sang Boracay.
Nagguwa man sa pagpangusisa nga ang duha ka sakayan ang hungod nga naglikaw sa Coast Guard inspection kag clearance, buot silingon, indi ini otorisado nga magkarga sang mga pasahero.
Natukiban nga nag-agi ini sa nabaw-ing nga area sa Boracay partikular ang Angol Point, Brgy. Manoc Manoc, Malay, Aklan sang kaagahon agud nga indi ma-detect sang law enforcement officers apang sang Agusto 26, na-report sa otoridad nga natabo na ang amo nga insidente.
