Ginkumpirma sang Philippine Drug Enforcement Agency (PDEA) nga duha ka Pilipino ang ginadudahan nga may kaangtanan sa ginapahayag nga pagtuyo sa pagsulod sa Pilipinas sang 521 kilos sang ginapatihan shabu nga halin sa Laos.
Suno kay PDEA Director General Isagani Nerez, nadakpan sa isa ka airport sa Laos ang Pilipino nga ginakilala sa alyas nga “Fahad” bangud sa ginapahayag nga drug smuggling.
May yara ini sang address sa Marawi kag sa pila pa ka lugar sa Luzon.
“Si Fahad, confirmed na Pilipino siya. Yung residence niya ngayon is in Marawi. Meron na tayong listahan kung saan pa yung mga ibang place of residence niya. ‘Yan na ngayon ang focus ng ating investigation dahil siya nakapulong ngayon doon,” suno sa opisyal.
“But the challenge is we have to establish yung link, sino mga kakuntsaba niya sa Pilipinas,” dugang niya.
Samtang, ginatudlo naman nga si alyas “Boyet” ang nag-arrange sang private jet nga kuntani gamiton sa pagdala sang droga halin Laos pakadto sa Pilipinas.
Suno kay Nerez, may impormasyon ang PDEA nga may kaangtanan si Boyet sa isa ka grupo sang mga nagabaligya sang ilegal nga droga.
“Alam namin he’s affiliated doon sa drug group na sinusundan namin. Dahil kaibigan niya yung nag-charter ng eroplano na yung tao na ’yan si Boyet ay nasa listahan ng PDEA,” suno pa kay Nerez.
Ginpahayag man ni Nerez nga may impormasyon na ang mga awtoridad kaangot sa posible nga mga kaupod sang duha sa Pilipinas, apang wala niya ini ginpatpat bangud padayon pa ang imbestigasyon.
Suno sa iya, kun makumpirmar na ang ila mga identity kag papel sa ginapahayag nga operasyon, diri na kag iproseso ang kaso.
Samtang, ginapangayo sang mga awtoridad sang Pilipinas sa ila counterparts sa Laos ang dugang nga impormasyon kaangot sa nakumpiskar nga droga.
Base sa inisyal nga impormasyon, naglupad ang Learjet halin Malaysia pakadto sa Laos agud kuhaon ang 23 ka maleta nga may sulod nga ilegal nga droga. Ginabanta nga nagabalor ini sang P11.5 billion.
Apang, nadiskubrehan ini sang mga awtoridad matapos nga nagbalibad ang piloto nga ikarga ang mga maleta.
Pahayag sang PDEA, mahimo mag-atubang si Fahad sang mabug-at nga silot, lakip ang death penalty, kun mapamatud-an nga may kaangtanan siya sa drug smuggling.
