Ginpasigurado sang Philippine Drug Enforcement Agency (PDEA) Region 6 nga preparado ang ila talatapan para sa Dinagyang Festival 2025.
Sa interview sang Bombo Radyo kay Ma. Graziella Tanaleon, Public Information Officer sang PDEA Region 6, iya ginpahayag nga Disyembre 2024 pa lang, nagakoordinar na ang ila talatapan sa pila ka mga government stakeholders lakip na ang Iloilo City Explosive Ordnance Disposal kag K9 Unit.
Suno kay Tanaleon, maga-deploy sila sang narcotic detection dogs kag mga personnel nga magadumala sa public safety and security.
Ginpahayag nga maga-focus ang talatapan sa deployment sa high trafficking areas, main event grounds, transportation terminal, gathering spots, kag ang usual nga lugar nga maka-attract sang dalagko nga crowd.
Ini agud man nga makaresponde gilayon ang PDEA kaupod ang local authorities kon hinali nga may mga insidente nga matabo.
Nagpasalig man ang natungdan nga apisar sang kahiwatan, nagapadayon ang pagpatuman sang buy-bust operation kabulig ang mga kapulisan.
