ILOILO CITY – Hugot ang pagbantay sang Philippine Drug Enforcement Agency sa mga paluparan kag pantalan agud nga matapna ang pagduging sang illegal drugs sa Western Visayas.
Sa interview sang Bombo Radyo kay Investigation Agent 3 Jason Cabataña, pinuno sang Airport Interdiction Unit sang Philippine Drug Enforcement Agency 6, iya ginpahayag nga may yara sang ginapatuman nga security protocol agud nga wala sang may makalusot nga illegal drugs sa mga paluparan sa rehiyon.
Suno kay Cabataña, may yara sang Airport Interdiction Unit personnel nga nagapatigayon sang inspection sa mga bagahe gamit ang X-ray machine kag drug sniffing dogs.
Ginpahayag ni Cabataña nga may yara sang profiling nga ginapatigayon agud nga mahibalu-an ang matuod nga identity sang pasahero.
Kun ginadudahan nga may yara sang unod nga illegal drugs ang bagahe, gilayon ini nga pagabuksan kag ipaidalom sa laboratory test ang sample nga makuha agud mahibalu-an nga illegal drugs gid man ang nakuha nga substance.
Ginatutukan sang Airport Interdiction Unit ang mga bagahe nga halin sa luwas sang pungsod.
Samtang suno naman kay Investigation Agent 3 Ruenell Butch Montenegro, pinuno sang Seaport Interdiction Unit sang Philippine Drug Enforcement Agency 6, kasubong sa ginahimu sang Airport Interdiction Unit, may yara sang security protocol nga ginasunod sa mga pantalan agud nga indi makalusot ang illegal drugs.
Ginpahayag ni Montenegro nga ginapaagi sa X-ray machine ang mga bagahe nga ginakarga sa cargo vessel.
May naka-stand by man nga canine dog agud nga mas madali nga matumod kun may yara sang illegal drugs nga ginpalusot sa pantalan.
Bangud nga kulang ang personnel kag resources sang ahensya, wala na nila ginatutukan ang mga bagahe nga ginakarga sa mga pribado nga salakyan.
Ini ang rason suno sa natungdan kun nga-a kalabanan sa mga supply nga nakuha gikan sa mga nagkaladakpan nga drug personality ang naghalin sa iban nga lugar.
Agud nga masolusyunan ang nasambit nga problema, ginpahayag ni Montenegro nga nagpakig-angot na ang ahensya sa Philippine Coast Guard kag Philippine Ports Authority.
