ILOILO CITY–May yara na sang bag-o nga Regional Director ang Philippine Drug Enforcement Agency (PDEA) 6.
Sa interview sang Bombo Radyo kay David Garcia, tagpamaba sang PDEA-6, iya ginpahayag nga si anay PDEA Regional Director Emmerson Margate ang temporaryo nga gin-assign sa PDEA Headquarters matapos mabaton ang relieve order nga napetsahan nga Disyembre 16.
Si Margate ang ginbuslan ni OIC Regional Director Alex Tablate halin sa Region 8.
Gin-athag ni Garcia nga wala nakasaad sa relive order kun ano ang rason kun nga-a ginhalin ang assigment ni Margate apang mahimo suno sa iya nga ini ang may kaangtanan sa kapaslawan sang PDEA nga pasakaan sang kaso ang apat ka katapo sang pamilya Regalado sa sulod sang reglementary period.
Magluwas kay Margate, ginrelieve man ang tanan nga katapo sang PDEA raiding  team nga nagserbe sang search warrant sa balay sang pamilya Regalado sa Brgy. Sambag, Jaro, Iloilo City.
Ini agud nga malikawan nga maimpluwensyahan ang pagpatigayon nga imbestigasyon tuhoy sa rason sang PDEA kun nga-a wala napasakaan sang kaso sanday Nelda, Arnolfo, Leo kag Cyril Regalado sa sulod sang reglementary period.
Nahibaluan nga ang mga subect sang nasambit nga raid ang himata ni the late Miriam Regalado Odicta nga misis sang ginpatay nga drug lord nga si Melvin Odicta Sr ukon mas kilala sa alyas nga Dragon.