ILOILO CITY – Ginkumpirma sang Philippine Drug Enforcement Agency (PDEA) nga wala nadala sa ila record ang ginapahayag durugista nga ginluthang patay sa drug buy bust operation sa Mandurriao Iloilo City.
Ang subject amo si Giovanni Guancia Mejica, 37 anyos sang Block 10, Lot 5, Imperial 6, Mandurriao Iloilo City kag ginakabig nga High Value Target (HVT) .
Sa interview sang Bombo Radyo kay PDEA 6 Regional Director Alex Tablate, iya ginpahayag nga si Mejica ang makabig nga newly identified drug personality.
Suno kay Tablate, ang PDEA kag Philippine National Police (PNP) ang makabig nga independent units kag tagsa sa ila ang may kaugalingon nga mga intelligence reports.
Ginpahayag ni Tablate nga may mga talaksan ang PNP antes makabig nga HVT ang isa ka personalidad kag ini ang ginbase sa ila estado sa sosyudad kaangay na lang sang mga elected officials kag government official.
Sa bahin naman sang PDEA, nakadepende naman sa mga recoveries sang iligal nga droga ang talaksan antes makabig nga HVT.
Matandaan nga si Mejica ang napatay matapos ginapahayag nagbato sa City Drug Enforcement Unit kag Mandurriao Police Station.
Nakuha naman sa posisyon ni Mejica ang mga de-kalibre nga armas, bala, mga iligal nga droga, drug paraphernalia kag granada.
