ILOILO CITY–Positibo ang Philippine Drug Enforcement Agency (PDEA) nga makuha ang isa ka tonelada nga shabu nga nakalusot sa Manila International Container Terminal (MICT).
Sa exclusive interview sang Bombo Radyo kay PDEA Spokesperson Derrick Carreon, ginpahayag sini nga ginmando na ni PDEA Director General Aaron Aquino nga dapat makit-an ang P7 billion nga balor sang shabu nga nakabutang sa apat nga magnetic lifters kag temporaryo nga gintago sa isa ka warehouse sa General Mariano Alvarez, Cavite.
Suno kay Carreon, magluwas sa Philippine National Police (PNP), pangayuon man nila ang bulig sang Armed Forces of the Philippines (AFP), National Bureau of Investigation (NBI), kag Bureau of Customs (BOC) agud mas mahapos nga makit-an ang mga droga.
Magapatigayon man sila sang backtrack investigation agud mahibaluan kun nga-a mahapos nga nalutsan sang ilegal nga droga ang MICT.
Nagapati naman si Carreon nga yara pa lang sa National Capital Region (NCR) kag Region 4A ang tonelada nga shabu.
Nagpanawagan man ang PDEA sa publiko nga gilayon ipabalo sa mga otoridad kung may makaduluda nga kargamento nga makit-an sa ila lugar.