ILOILO CITY – Nagdepensa ang Philippine Drug Enforcement Agency (PDEA) matapos ginpahayag ni Iloilo City Mayor Jed Patrick Mabilog nga kaangay nga wala makalab-ot sa national government ang ginahimo sang siyudad batok sa iligal nga droga.
Sa interview sang Bombo Radyo Iloilo, ginpahayag ni PDEA-6 director Atty. Gil Pabilona nga ila ginapalab-ot sa central office ang mga aktibidad sang Iloilo City sa kampanya batok sa iligal nga droga.
Suno sa alkalde, posible wala mahibaluan sang national government ang illegal drug campaign sang Iloilo rason nga gintawag ini ni Presidente Rodrigo Duterte nga “bedrock of drugs” nga liwat sini ginsulit kaina sang hapon sa iya speech sa Camp Aguinaldo, magluwas pa sa bansag sini sa Iloilo nga “most shabulized city”.
Ginpahayag ni Pabilona nga wala man ini sang ideya sa basehan ni Duterte sa mga akusasyon batok sa Iloilo.
Apang sa ila bahin sa PDEA, ginpahayag ni Atty. Pabilona nga isa ini ka panghangkat sa ila agud doblehon ang pagpanikasog nga malimpyuhan sa droga ang Iloilo.
Una na ginpaboran sang PDEA ang pahayag ni Pres. Duterte nga “bedrock of drugs” ang Iloilo.