Nagpaandam ang Philippine Drug Enforcement Agency (PDEA) sa publiko kaangot sa pagbakal sang mga vapes nga may nalakip ukon may flavor nga marijuana.
Sa joint operation sang ahensya kag Taguig City Police sa Taguig City sang nagligad nga Marso 14, duha ka drug personalities ang naaresto kun sa diin nakumpiskar man sang otoridad ang cannabis oil, marijuana kush kag assorted vaping devices nga nagabalor P842,000.
Magluwas diri, nakumpiskar man sang ahensya kag Bureau of Customs (BOC) sa Port Area, Manila sang nagligad nga semana ang 18 ka balik-bayan boxes nga nagaunod sang cannabis oil kag marijuana kush nga nasulod sa e-cigarettes kun sa diin ginabanta nagadangat ang balor sa P337 million.
Bangud sini nga pagpalusot sang marijuana oil cartridges, nagapati ang otoridad nga nagasaka man ang domestic demand sa sini nga mga produkto.
Ginakahangaw-an man sang PDEA nga mapalusot man ini nga vape aerosol nga may cannabis extract sa mga merkado kag mabaligya sa mga pamatan-on ilabi na bangud komon na ang vaping sa mga kabataan.
Nag-abiso man ang ahensya sa publiko nga likawan ang paggamit sang marijuana-laced e-cigarettes bangud una, ginadumilian ini sang layi, kag ikaduha, delikado ini sa ikaayong lawas.
Agud ma-address ini nga isyu, ginapabaskog pa sang ahensya ang ila nga monitoring agud nga ma-detect ang physical kag online vape shops nga nagabaligya sang cannabis-flavored e-cigarettes kag naangot nga mga paraphernalia.#
