ILOILO CITY – Padayon ang monitoring sang Philippine Drug Enforcement Agency (PDEA) sa top suspected drug personality sang Western Visayas nga si Ernesto ‘Erning’ Bolivar.
Ini matapos nga nasiplatan ang presensya ni Bolivar sa probinsya sang Iloilo.
Sa interview sang Bombo Radyo kay David Garcia, tagpamaba sang PDEA-6, iya ginpahayag nga may yara na sang ginpaguwa nga bounty ukon padya sa makatudlo kun sa diin na si Bolivar nga may yara sang standing warrant of arrest.
Indi lang matul-id ni Garcia kun ang padya ang naghalin sa Iloilo Police Provincial Office (IPPO), Iloilo City Police Office (ICPO) ukon sa Iloilo Provincial Government.
Samtang magluwas kay Bolivar, ginpahayag ni Garcia nga padayon man ang monitoring sang PDEA sa mga existing drug group kag mga bag-o nga drug personality sa Iloilo.
Ginpahayag ni Garcia nga indi pa validated ang ila impormasyon tuhoy sa mga nagtuhaw nga bag-o nga drug personality.
Sa subong suno sa natungdan, amat-amat na nga nabungkag ang Odicta Drug group apang indi man madula ang remnants sang nasambit nga grupo.
