Ginpasaka na sa red alert status ang Iloilo Provincial Disaster Risk Reduction and Management Council (PDRRMC) kag mga Emergency Operation Center (EOC) kasunod sang nagapahilapit nga Bagyo Tino.
Suno sa Provincial Government, naka-standby na ang tanan nga responder nga magahatag sang bulig sa tion sang emerhensya.
Bangud sang pagtaas sang alert level, activated na ang operation center, kag may mga work stations na ang response cluster nga ginalakipan sang social welfare, force multipliers, kag engineering teams.
Ini agud nga kun ano man ang kinahanglanon sang kada opisina ukon kabanwahanan sa probinsya, gilayon nga matawagan ang mga regional offices kag mapadal-an sang nagakaangay nga bulig.
Magluwas sini, ginpahayag man nga maga-implementar sang pre-emptive ukon forced evacuation measures ang probinsya sa mga high-risk areas nga posible maapektuhan sang bagyo.
Base sa pinakabag-o nga monitoring, yari ang mga kabanwahanan sa Probinsya sang Iloilo nga posible makaeksperyensya sang 1 tubtob 2 ka metro nga storm surge sa masunod nga 48 ka oras:
•Ajuy
•Anilao
•Banate
•Barotac Nuevo
•Barotac Viejo
•Batad
•Carles
•Concepcion
•Dumangas
•Estancia
•Guimbal
•Leganes
•Miagao
•Oton
•San Dionisio
•San Joaquin
•Tigbauan
•Zarraga
Sa subong, magapabilin nga nakaalerto ang Emergency Operation Center kag Response Cluster Team sang Iloilo Provincial Government agud nga magpadayon sa pag-monitor sa bagyo kag pagkoordinar sa mga regional offices.
Ginapanawagan man sang mga otoridad sa publiko nga magpabilin nga kalmado apang alerto, kag magasunod sa opisyal nga mga pahibalo.
