ILOILO CITY- Madamo na sang nabaton nga tawag ang Provincial Disaster Risk Reduction and Management Office, humalin sang ginpaguwa ang Memorandum Order no. 21 ni Iloilo Governor Arthur Defensor Jr., may kaangtanan sa guidelines para sa returning residents sang probinsya sang Iloilo.
Sa interview sang Bombo Radyo kay Provincial Disaster Risk Reduction and Management Office head Dr. Jerry Bionat, iya ginpahayag nga nakabaton na siya sang tawag gikan sa local strandees nga yara sa nagkalain-lain nga lugar sa pungsod.
Suno kay Bionat, kun yara pa sa idalom sang Enhanced Community Quarantine ang lugar, kinahanglan sang local strandees ang mga masunod nga dukomento agud nga makapauli:
(1) negative result sang Reverse Transcription–Polymerase Chain Reaction test
(2) Certificate of Acceptannce gikan sa banwa nga paulian
(3) Certification sang Local Health Officer sa lugar nga ginhalinan kag
(4) Certification of Acceptance nga pirmado ni Iloilo Governor Arthur Defensor Jr.
Kun yara naman sa General Community Quarantine, kinahanglan nga may yara sang:
(1) Certification of Acceptance gikan sa alkalde sang banwa nga paulian
(2) Certification sang Local Health Officer kag
(3) Certification of Acceptance nga pirmado ni Iloilo Governor Athur Defensor Jr.
Antes magpauli ang local strandees, kinahanglan nga mahitso ang nagakaigo nga requirements bangud sa tion nga mapaslawan, indi maghatag sang Certification of Entry ang gobernador.
Mismo ang local strandees ang magapakig-angot sa ila pamilya agud makakuha sang nagakaigo nga dokumento kag dapat ini nga ipasa sa Provincial Disaster Risk Reduction and Management Office.
