ILOILO CITY – Gin-akusaran sang Panay Electric Company nga bias si Hon. Emerald Contreras, presiding judge sang Branch 23 sang Ramon Avanceña Hall of Justice.
Sa ginpatigayon nga press conference sang Panay Electric Company, ginpahayag ni Atty. Estrella Elamparo, legal counsel sang kompaniya nga ginapanag-iyahan sang pamilya Cacho, nga antes pa man ginpaguwa ang desisyon tuhoy sa Writ of Posession kahapon nga adlaw, nagkitaay sanday Contreras kag ang Filipino billionaire nga si Enrique Razon nga amo ang tag-iya sang MORE Power.
Suno kay Elamparo, ang nasambit nga impormasyon ang halin sa ila reliable source nga wala na niya ginhingadlan.
Kadungan sini, liwat nga ginpanindugan ni Elamparo nga wala ginsunod sang MORE Power ang addendum nga ang Panay Electric Company sa gihapon ang magadumala sa assets samtang wala pa sang desisyon ang Korte Suprema sa Issuance of Constitutionality.
Padayon sa gihapon ang legal battle sa tunga sang Panay Electric Company kag MORE Electric and Power Corporation apisar sang take-over nga natabo.
Ini ang pahayag ni Marcelo Cacho, administrative manager sang Panay Electric Company, matapos ang ginpatigayon nga press conference.
Sa interview sang Bombo Radyo kay Cacho, iya ginpahayag nga pending pa sa gihapon sa Korte Suprema ang Issuance of Constitutionality.
Suno kay Cacho, ang ila pamilya sa gihapon ang tag-iya sang assets nga nalakip sa Writ of Posession nga sa pagkamatuod, wala pa nasuma ang bili kag wala pa nabayaran sang MORE Power.
Ginpahayag ni Cacho nga wala sang Certificate of Public Convenience and Necessity ang MORE Power kag ini ang lain sa prangkisa.
May kaangtanan naman sa pahayag ni Elamparo, ginpahayag ni Cacho nga indi siya makahatag sang pahayag bangud nga kinamatarong man sang abogada nga magpahayag sang iya bahin.
