ILOILO CITY – Ginahulat na lang sang Panay Electric Company ang Official Receipt gikan sa Iloilo City Government kasunod sang pagbayad sang kompaniya sang indi magnubo sa P134 million nga Real Property Tax.
Sa interview sang Bombo Radyo kay Marcelo Cacho, administrative manager sang Panay Electric Company, iya ginpahayag nga mismo si City Treasurer Jinny Hermano ang nagbaton sang manager’s cheque nga nagabalor sang P134.9 million.
Suno kay Cacho, sakop sang ginbayad nga P134.9 million amo ang P98 million nga Real Property Tax para sa first assessment sa mga poste kag P75 million sa second assessment sa mga transformer, linya sang kuryente kag isa ka sub station.
Ginpahayag ni Cacho nga wala pa diri nadala ang interes bangud nga padayon pa ini nga ginasuma sang assessment board.
