ILOILO CITY – Ginakabig sang Panay Electric Company nga bentaha para sa ila ang ginpaguwa nga duha ka notice sang Korte Suprema may kaangtanan sa expropriation proceeding sang MORE Electric and Power Corporation.
Ginapasabat sang Supreme Court Second Division sa sulod sang 10 ka adlaw ang MORE Electric and Power Corporation kag si Presiding Judge Marie Yvette Go sang Iloilo Regional Trial Court Branch 37 tuhoy sa pagpatigayon sang expropriation proceeding bisan pa nga may yara sang ruling ang Mandaluyong Regional Trial Court nga unconstitutional ang pagpatigayon sang expropriation proceeding.
Sa interview sang Bombo Radyo kay Marcelo Cacho, administrative manager sang Panay Electric Company, iya ginpahayag nga magapadayon sa gihapon ang pagserbisyo sang ila kompaniya bilang electric power distibutor sa syudad sang Iloilo.
Suno kay Cacho, paagi sa ginpaguwa nga initial decision sang Korte Suprema, buhi sa gihapon ang desisyon sang Mandaluyong Regional Trial Court sang Hulyo 1 sa diin nakasaad nga indi kinahanglan nga ibaligya sang Panay Electric Company ang ila asset kag wala sang kinamatarong ang MORE Electric and Power Corporation nga magpatigayon sang expropriation proceeding.
Ginpahayag ni Cacho nga gindeklarar sang Mandaluyong Regional Trial Court nga wala sang pulos ang Sections 10 kag 17 sang Republic 11212 ukon ang layi nga nagapahanugot sa MORE Electric and Power Corporation nga kuhaon ang asset sang Panay Electric Company agud nga mangin bag-o nga electric power distributor sa syudad sang Iloilo.
Matapos ang nasambit nga ruling sang Hulyo 1, ginpahayag sang natungdan nga wala kun tani nagpadayon ang expropriation proceeding kag hulaton na lang ang final decision sang Korte Suprema.
Sa subong suno kay Cacho, buhi sa gihapon ang paglaum sang Panay Electric Company kag ila hulaton ang final decision sang Korte Suprema nga amo ang pinakamataas nga hukom sa pungsod.
