ILOILO CITY- Nagapati ang Panay Electric Company sa posibilidad nga may pagpang-sabotahe nga natabo kun ngaa naglawig sang duha ka adlaw ang power outage sa Syudad sang Iloilo sang nagligad nga semana.
Sa interview sang Bombo Radyo kay Marcelo Cacho,Head sang Public Engagement and Government Affairs sang Panay Electric Company, iya ginpahayag nga wala pa natabo nga naglawig sang 12 oras ang brown-out bangud ang pinakamalawig na nga na-eksperyensiyahan ang anom ka oras gid lang.
(photo:abrown.ph)
Matandaan nga sang Oktubre 29, nag shut down ang coal-fired plants nga gina- operate sang Global Business Power subsidiary nga Panay Energy Development Corp (PEDC) kag ang planta nga ginapadalagan sang Palm Concepcion Power Corporation (PCPC) sa banwa sang Concepcion, Iloilo.
Suno kay Cacho, Nobyembre 2 na sang nagbalik sa operasyon ang planta sang Palm Concepcion Power Corporation nga suno kay Cacho,tuman ka iregular kag indi kinaandan.
Magluwas diri, ginpahayag man ni Cacho nga mahimo may mga tawo sa likod sang pagpangguba sa Panay Electric Company agud dalayon na nga mahigkuan ang pangalan sini.
Apang gin-athag ni Cacho nga wala sila sang may ginatumod ukon ginatudlo nga responsable sa pagpangsabotahe.
Nahibaluan nga mainit gihapon ang pag-agaway sang Panay Electric Company kag More Energy and Power Corporation agud mangin power distributor sa syudad sang Iloilo.
Samtang, nagdepensa ang Palm Concepcion Power Corporation kasunod sang suspisyon sang Panay Electric Company nga may natabo nga pagpangsabotahe sa nagluntad nga malawig nga brown -out sa Iloilo City sang Oktubre 29.
Sa interview sang Bombo Radyo Iloilo kay Engr. Alvin Quintanar, Vice President for Operations and Maintenance sang Palm Concepcion Power Corporation, iya ginpahayag nga wala sang may nag-manipula sa ila planta agud padugayon ang pagbalik sang suplay sang kuryente.
Suno kay Quintanar, naka-eksperyensiya sang system fault ang National Grid Corporation of the Philippines nga nagtuga sang pagtrip-off sang Panay Energy Development Corporation unit nga sang ulihi nagresulta sa low voltage sa systems kag naapektuhan man ang planta sang Palm Concepcion Power Corporation.
Ginpahayag ni Quintanar nga kun manubo ang boltahe,automatic nga magatrip-off man ang ila planta.
Suno pa sa iya, imposible nga mangsabotahe sila bangud gindimalas lang gid ang ila planta sang amo nga adlaw.
